Koeno Nomden - Fit leven
Koeno Nomden is eigenaar van sportschool De Wenakker in Veelerveen. Schrijver Fieke Gosselaar schreef zijn verhaal.
As wie tot boom oet sodemieterden
namen wie ons liggoam mit
en gingen wieder.
Tussen mìnsen vergaten wie
hou ons lief in mekander stekt.
Wie zitten n dag.
Der vaalt n pen op grond.
Wie boegen onze rogge en pakken t op.
Wie willen noar boeten as de wind blast,
nemen onze hond mit as wie wandeln goan.
T is nou ainmoal zo dat d’aine beder fietsen kin as d’aander.
Dou ze laank leden drij kenoalen gruiven,
deden ze dat mit heur handen.
Heur liggoamen waren rap versleten.
Achter ons bureau leggen wie kin op de bòrst
en brengen t heufd noar achteren.
Soavends hebben wie tied om te roeien
en broeken onze knijen om te tillen.
Man dij 250 kilo opheft, dut dat zörgvuldeg.
Hai et zien aaier zaacht.
